Haustcamp på Bømoen

Velkomne til Voss og Bømoen leir frå fredag 16. september til søndag 18. september. Det vert 3 aktive dagar for deltakarane på denne allsidige breiddesamlinga for skikretsen sine ungdomar. Me bur i leiren og får maten servert der. Samlinga er for dei som skal opp i 12 års klassen til vinteren til og med dei som skal opp i 16 års klassen. Alle skigreiner er invitert og allsidig aktivitet og det sosiale står i fokus.

Nokre økter vert felles for alle og nokre vert greinspesifikke. Området rundt Bømoen og på Voss vert nytta til dei ulike aktivitetane. Nattorientering, elvepadling, utfordrande hallaktivitetar, terrengsykling, rulleski og rollerblades er noko av det me har hatt på programmet på haustcampen. Årets program i lag med ei "ta med liste" vert oppdatert. Dyktige trenerar frå våre skiklubbar og skikretsen er klar til å skape ei kjekk samling for alle deltakarane.