Telemarksving i Sogn
Syril IL telemark og Luster IL telemark arrangerte flotte arrangement ved Sogndal Skisenter Rindabotn laurdag 18. og Sogn Skisenter Heggmyrane søndag 19. desember.
Egil Johannes Vangsnes, Syril Telemark, Niri Frideson, og Jan Sølve Haugen, Luster IL, fekk med seg Skiforbundet sin telemarkhengar, fleire profilerte instruktørar og arrangerte to flotte skidagar laurdag 18. og søndag 19. desember. Dei lånte ut utstyr til både barn, undom og vaksne, og alle fekk instruksjon og rettleiing mens dei prøvde seg i bakken.
Laurdag 18. desember hadde Syril telemark, ilag med NSF telemark sin telemarkhengar, arrangement i gode forhold i barneheisen i Rindabotn. Der vart det laga ulike løyper, med svingar og hopp - samt ei meget populær "crossløype" utanfor preppa bakke. Her fekk alle utfordra seg på mange måtar og det var full aktivitet heile dagen,spesielt mellom 11.30 og 13.30. Tidlegare aktiv på høgt nivå, Øyvind Vagstad, Syril IL, bidrog med god instruksjon.
Søndag 19. desember rigga dei opp arenaen til nytt arrangement i Heggmyrane. Her var det gode forhold for køyring opp til mast 10 og såleis gode moglegheiter for instruksjon. Øyvind Vagstad fekk med seg Andrea og Eirin Fiskaa Haugen, Luster IL, som instruktørar denne dagen. Det var ein klar vinterdag, så bålpanna og servering av pølser og fiskekaker gjorde seg, her som i Sogndal Skisenter.
Totalt var det om lag 70 barn, unge og vaksne som fekk prøve seg på telemarkteknikken desse dagane.
